‘सीएसएमटी’चा फलाट क्रमांक १८ बंद

मुंबई, ता. २७ ः छत्रपती शिवाजी महाराज टर्मिनस (सीएसएमटी) येथील पुनर्विकास कामासाठी मध्य रेल्वेकडून फलाट क्रमांक १८वर ८० दिवसांचा ट्रॅफिक आणि पॉवर ब्लॉक घेण्यात येणार आहे. हा ब्लॉक १ ऑक्टोबर ते १९ डिसेंबर २०२५ या कालावधीत राहणार असून, या काळात या फलाटावरील रेल्वे वाहतूक पूर्णपणे बंद राहील. या निर्णयामुळे सीएसएमटीकडे धावणाऱ्या काही गाड्या थेट दादर स्थानकावर शॉर्ट टर्मिनेट करण्यात येणार आहेत. यात ट्रेन क्रमांक १२११२ अमरावती-सीएसएमटी एक्स्प्रेस आणि ट्रेन क्रमांक ११००२ बल्लारशाह-सीएसएमटी एक्स्प्रेसचा समावेश असून, या गाड्या ३० सप्टेंबरपासून पुढील आदेशापर्यंत दादर येथेच थांबतील. रेल्वेने दिलेल्या माहितीनुसार, सीएसएमटीच्या पुनर्विकासाची कामे रेल भूमी विकास प्राधिकरण (आरएलडीए)मार्फत सुरू आहेत. या ब्लॉकदरम्यान फलाट क्रमांक १८ वर सुरक्षा बॅरिकेड्सची उभारणी आणि इतर पायाभूत सुविधांची कामे केली जाणार आहेत. सध्या सीएसएमटीतील फलाट क्रमांक १२ आणि १३ वर डेकसाठी खांब उभारण्याचे काम सुरू असून ते पूर्ण झाल्यानंतर ते प्रवाशांसाठी उपलब्ध होणार आहे. त्यानंतर फलाट क्रमांक १८ वरील कामे हाती घेतली जातील, असे रेल्वे अधिकाऱ्यांनी स्पष्ट केले.