नेरूळमध्ये नशामुक्ती रॅली
जुईनगर, ता. २८ (बातमीदार) ः नेरूळ येथील एसआयईएस काॅलेज ऑफ आर्ट्स, सायन्स ॲण्ड कॉमर्स, अन्वय व्यसनमुक्ती केंद्र आणि नेरूळ पोलिस ठाणे यांच्या संयुक्त विद्यमाने नशामुक्ती रॅली काढण्यात आली होती. या प्रभातफेरीतून व्यसनमुक्तीचा संदेश देण्यात आला. या वेळी एसआयईएस कॉलेजच्या एनएसएस विभागाचे दीडशे विद्यार्थी सहभागी झाले होते.
प्रत्येक विद्यार्थ्यांच्या हातात व्यसनविरोधी फलक आणि घोषणांनी नेरूळचे रस्ते दणाणून सोडले. नेरूळ स्थानकाच्या परिसरात व्यसनमुक्तीबाबत पथनाट्य विद्यार्थ्यांनी सादर केले. ते पाहण्यासाठी आबालवृद्धांची गर्दी झाली होती.
या रॅलीत प्रा. कामिनी ठाकूर, योगेंद्र दळवी, तनिश हजारी हे एनएसएस अधिकारी, अन्वय व्यसनमुक्ती केंद्राचे संचालक डॉ. अजित मगदूम, मुक्ता महापात्रा, मल्लिका सुधाकर, वसंत वळकुंडे, मनीषा वळकुंडे, जालिंदर यमगर नेरूळ पोलिस ठाण्याचे वरिष्ठ निरीक्षक ब्रह्मानंद नाईकवाडी, पोलिस निरीक्षक पंकज घाडगे, संजय लाड आदी सहभागी झाले होते.