भिवंडीत विवाहितेची आत्महत्या
पतीसह नणंदेवर गुन्हा दाखल
भिवंडी, ता. २७ (वार्ताहर) : विवाहितेच्या आत्महत्येप्रकरणी मृत विवाहितेच्या आईच्या तक्रारीवरून पतीसह नणंदेच्या विरोधात नारपोली पोलिस ठाण्यात गुन्हा दाखल करण्यात आला आहे. शुभांगी बाळू लोंढे (वय २७) असे मयत विवाहितेचे नाव आहे. तर पती बाळू भास्कर लोंढे (वय ३३) आणि नंणद शीतल ताते (वय २९) अशी गुन्हा दाखल झालेल्यांची नावे आहेत.
शुभांगी ही मूळची पुणे, खेड येथील रहिवासी होती. सप्टेंबर २०२३मध्ये तिचा विवाह भिवंडीतील साठेनगर येथील बाळू याच्याशी झाला होता. लग्नानंतर पती बाळू आणि नणंद शीतल यांनी संगनमत करून सप्टेंबर २०२३ ते २१ सप्टेंबर २०२५ या कालावधीत शुभांगीचा शारीरिक आणि मानसिक छळ केल्याचा आरोप मृत शुभांगीची आई निर्मला फुलचंद गालफाडे (वय ४३) यांनी केला आहे.
या छळाला कंटाळून अखेर २१ सप्टेंबर २०२५ रोजी शुभांगीने ओढणीच्या सहाय्याने गळफास लावून आपली जीवनयात्रा संपवली. तक्रारीनंतर नारपोली पोलिसांनी पती बाळू आणि नणंद शीतल यांच्याविरोधात गुन्हा दाखल केला असून, पोलिस उपनिरीक्षक सोनाली पाटील या घटनेचा पुढील तपास करीत आहेत.