वज्रेश्वरी, ता. २५ (बातमीदार) : भारत सरकारच्या अर्थ मंत्रालय, वित्तीय सेवा विभागाच्या वतीने १ जुलै ते ३० सप्टेंबर कालावधीत देशभरातील ग्रामपंचायतींमध्ये विशेष वित्तीय समावेशन शिबिरे होत आहेत. त्यानुसार भिवंडी तालुक्यातील घोटगाव येथे वज्रेश्वरी येथील कॅनरा बँकेच्या वतीने वित्तीय समावेशन शिबिर घेण्यात आले. प्रधानमंत्री जनधन योजना, प्रधानमंत्री जीवन ज्योती विमा योजना, प्रधानमंत्री सुरक्षा विमा योजना आणि अटल पेन्शन योजना यांसारख्या महत्त्वाच्या वित्तीय समावेशन योजनांची माहिती यावेळी देण्यात आली. शिबिराचे उद्‍घाटन आर. राजेश (महाव्यवस्थापक, एच.ओ., बंगळुरू), अमित कुमार अस्थाना (डीजीएम, आरओ, उत्तर मुंबई), दीपेश डेधिया (डीजीएम, सीओ, मुंबई), घोटगावचे सरपंच संजना थापड, विपिन कुमार सिंग (एजीएम, आरओ, उत्तर मुंबई) आणि व्यवस्थापक कुमार निल मणी उपस्थित होते. नागरिकांनी या योजनांचा जास्तीत जास्त लाभ घेण्याचे आवाहन केले. बचत खात्यांचे री-केवायसी पूर्ण करण्याचे महत्त्व अधोरेखित केले. डिजिटल फसवणूक टाळण्यासाठी आवश्यक उपाययोजनांबाबतही मार्गदर्शन केले.
यावेळी प्रधानमंत्री जीवन ज्योती विमा योजना आणि प्रधानमंत्री सुरक्षा विमा योजना चे लाभार्थी यांचा सन्मानही करण्यात आला.