परतीच्या पावसाने नवरात्रोत्सवाला फटका
पेण, ता.२७ (वार्ताहर) : दोन दिवसांपासून महाराष्ट्राच्या काही भागांमध्ये परतीच्या पावसाने धुमाकूळ घातला आहे. पेणमध्ये सुद्धा पावसाने दाणादाण उडाली असून नवरात्रोत्सवाच्या आनंदावरच विरजण फेरले आहे.
पावसामुळे तालुक्यातील शेतीचेही नुकसान होत आहे. चांगले आलेले उभे पीक परतीच्या पावसामुळे आडवे होण्याची भीती शेतकऱ्यांमध्ये निर्माण आहे. अशातच शनिवारी सकाळपासूनच पावसाचे पुन्हा जोरदार हजेरी लावली होती. तासाभरानंतर पावसाने विश्रांती घेतल्यामुळे थोडाफार दिलासा मिळाला असला तरी सगळीकडे चिखलाचे साम्राज्य पसरले आहे. शहरातील अंबिका माता, महावीर मार्ग, कुंभार आळी, नंदीमाळ नाका, कंवडाळ तळे, कोंबडपाडा, चिंचपाडा येथील मंडळांच्या कार्यकर्त्यांची तारांबळ उडाली. तर अनेक मंडळांना गरबा दांडिया रास बंद करण्याची वेळ आली.