प्रभादेवीतील जागृत देवस्थान श्री जाखादेवी
प्रभादेवी, ता. २८ ः भक्तांच्या हाकेला धावणारी हजारो भाविकांची श्रद्धास्थान असलेली प्रभादेवी खेडगल्ली येथील जागृत देवस्थान असलेल्या श्री जाखादेवी मंदिरात नवरात्रोत्‍सवानिमित्त ओटी भरण्यासाठी गर्दी होत आहे.
जाखादेवी मंदिरातील गाभारा फुलांनी साजविण्यात आला असून, विद्युत रोषणाईने परिसर उजळून निघाला आहे. आजूबाजूचे वातावरणदेखील प्रफुल्लित झाले आहे. पौष पौर्णिमेला जानेवारीत देवीचा मोठा उत्सव साजरा करण्यात येतो. या वेळी विविध कार्यक्रमांचेदेखील आयोजन करण्यात येते, असे मंदिराचे विश्वस्त पल्लवी कोरे यांनी सांगितले.
ब्रिटिशांच्या काळात येथील रस्‍ता बनवताना खोदकामात गोखले रोड येथे ही मूर्ती सापडली. त्यावेळेस मूर्तीच्या चहूबाजूंनी सापांनी वेढले होते. त्यानंतर ती मूर्ती बाहेर काढण्यात आली, अशी अख्यायिका आहे. १९ व्या शतकात अनंत कवळी यांनी हे मंदिर उभारले. १०० वर्षांहून अधिक जुने असे हे मंदिर असून, आज या परिसराला जाखादेवी या नावाने ओळखले जाते.