दादरमध्ये गुजरातच्या वाढवान महलची प्रतिकृती
प्रभादेवी, ता. २८ (बातमीदार) ः नवरात्रोत्सवाचे औचित्य साधून दादरमधील वाघरी समाजाने यंदा गुजरातमधील ऐतिहासिक वाढवान महलची भव्य प्रतिकृती साकारली आहे. ही सजावट पाहण्यासाठी आणि देवीचे दर्शन घेण्यासाठी भाविकांची गर्दी होत आहे.
दादरमध्ये जय गोल्फा देवी वाघरी समाज सेवा मंडळाने गुजरातमधील वाढवान महलची २५ फूट उंच प्रतिकृती साकारली आहे, तर महलमध्ये विराजमान झालेल्या भवानी मातेचे जाज्वल्य तेजोपुंज रूप विलक्षण असेच आहे. वाढवान महलची नक्षीकामाने सजलेली रचना, सूक्ष्म कलात्मक डिझाइन आणि आकर्षक प्रकाशयोजना पाहण्यासाठी नागरिक मोठ्या संख्येने दाखल होत आहेत. पारंपरिक तंत्राचा सुंदर मेळ घालत वाघरी समाजातील तरुणांनी मिळून स्वतःच ही प्रतिकृती उभारली आहे.
सांस्कृतिक कार्यक्रमातून तरुणांना सामाजिक संदेश दिला जातो, असे जय गोल्फा देवी वाघरी समाज सेवा मंडळाचे अध्यक्ष प्रकाश खाखोडिया यांनी सांगितले. दादर परिसरात दोन हजारांहून अधिक असलेला वाघरी समुदाय नवरात्री मोठ्या उत्साहात साजरा करतात. नऊ दिवस चालणाऱ्या गरबा-दांडिया सोहळ्यात तरुणाईसोबतच सर्व वयोगटातील लोक उत्साहाने सहभागी होतात.