वज्रेश्वरीत उत्सवावर पाणी
वज्रेश्वरी, ता. २८ (बातमीदार) ः वज्रेश्वरी या परिसरात शनिवारी (ता. २७) रात्रीपासून मुसळधार पाऊस सुरू आहे. पावसामुळे नवरात्रीच्या उत्सवावर पाणी फेरल्याने रसिकांचा हिरमोड झाला. रविवार सुट्टीचा दिवस असूनही नवरात्रीनिमित्त दर्शनासाठी येणाऱ्या भविकांची संख्या कमी होती. तसेच शहरात शुकशुकाट होता. शनिवारी रात्रीपासून विजेचा कडकडाट व ढगांच्या गडगडाटात पडलेल्या मुसळधार पावसामुळे येथील रस्ते पाण्याखाली गेले. तर वज्रेश्वरी, गणेशपुरी, अकलोलीत तानसा नदी दुथडी भरून वाहत असल्याने पूरस्थिती आहे. भिवंडी ग्रामीण भागातील अंबाडी, वज्रेश्वरी, गणेशपुरी अकलोलीत मुसळधार पावसामुळे सखल भागांमध्ये पाणी साचल्याने वाहतूक विस्कळित झाली.