हस्तगत मालमत्तेचे नागरिकांना वितरण
घाटकोपर, ता. २८ (बातमीदार) ः मुंबई पोलिस आयुक्त देवेन भारती यांच्या संकल्पनेतून परिमंडळ ७ अंतर्गत चोरीस गेलेले व गहाळ झालेला मौल्यवान मुद्देमाल परत करण्यासाठी भांडुप येथील जैनम हॉल येथे कार्यक्रमाचे आयोजन केले होते. भांडुप पश्चिमेतील जैनम हॉल, एलबीएस रोड येथे झालेल्या या कार्यक्रमात परिमंडळ ७ अंतर्गत भांडुप, घाटकोपर, पंतनगर, विक्रोळी, पार्क साइट, कांजूरमार्ग, मुलुंड व नवघर या आठ पोलिस ठाण्यांकडून जप्त करण्यात आलेली मालमत्ता तक्रारदारांना परत देण्यात आली. या कार्यक्रमात मोबाईल चोरी, जबरी चोरी, स्नॅचिंग, घरफोडी तसेच इतर गुन्ह्यांमध्ये हस्तगत झालेल्या मालमत्तेचा समावेश होता. पोलिसांच्या तांत्रिक तपासातून एकूण ८९ लाख ७९ हजार ५०८ रुपये किमतीचे दागिने, मोबाईल व वाहने तक्रारदारांना सुपूर्द करण्यात आली. पोलिस उपायुक्त, परिमंडळ ७चे राकेश ओला यांच्या हस्ते संबंधित नागरिकांना मालमत्ता परत करण्यात आली.