दागिन्यांसह रोकड चोरणाऱ्या महिलेसह साथीदारास अटक

नवी मुंबई, ता. २८ (वार्ताहर) ः आईची शुश्रूषा करण्यासाठी घरामध्ये कामासाठी ठेवलेल्या महिलेने तिच्या मित्राच्या मदतीने घरातील तब्बल २३ लाख रुपये किमतीचे २३ तोळे वजनाचे दागिने चोरून नेल्याचे उघडकीस आल्यावर नेरूळ पोलिसांनी याप्रकरणी आरोपी महिला व तिचा मित्र या दोघांना अटक केली आहे. तसेच चोरीस गेलेले दागिने पश्चिम बंगालमधून हस्तगत केले आहेत.
नेरूळच्या शिरवणे गावात राहणारे मिलिंद भोईर (वय ३८) यांनी आईच्या गुडघ्याचे ऑपरेशन झाल्याने तिची शुश्रूषा करण्यासाठी वर्षा विनोद कांबळे (वय ३४) या महिलेला आपल्या घरामध्ये कामाला ठेवले होते. वर्षा हिने संधी साधून भोईर यांच्या घरातील तब्बल २३ तोळे वजनाचे २३ लाख रुपये किमतीचे दागिने चोरून ते आपला मित्र राकेश शंकर खोपटकर (वय ४०) याला दिले होते. दरम्यान, गत आठवड्यात चोरीचा हा प्रकार उघडकीस आल्यानंतर मिलिंद भोईर यांनी नेरूळ पोलिस ठाण्यात याबाबत तक्रार दाखल केली होती. त्यानंतर पोलिसांनी ही कारवाई केली. पोलिसांनी प्रथम आरोपी महिलेस आणि नंतर राकेशला कल्याण रेल्वेस्थानकावरून अटक केली.