भातसा नदीने ओलांडली धोक्याची पातळी
पडघा, दि. २८ (बातमीदार) : पावसाच्या संततधारेमुळे भिवंडी व कल्याण तालुक्याच्या हद्दीतून वाहणाऱ्या भातसा नदीने धोक्याची पातळी ओलांडली आहे. यामुळे मध्य रेल्वेच्या खडवली स्थानकाकडे जाणारा पूल पाण्याखाली गेला आहे.
खडवली परिसरात शनिवारपासून (ता. २७) पावसाची संततधार सुरू असून. रविवारी (ता. २८) पावसाचा जोर वाढल्याने खडवली येथील भातसा नदीने धोक्याची पातळी ओलांडली आहे. त्यामुळे पडघा व मुंबई-नाशिक महामार्गावरून मध्य रेल्वेच्या खडवली स्थानकाकडे तसेच टिटवाळा मुरबाड, बदलापूरकडे जाण्यासाठी असणारा खडवली नदीवरील पूल पाण्याखाली गेल्याने वाहतूक बंद करण्यात आली. यामुळे खडवली रेल्वेस्थानकारून मुंबई, खडवली परिसरातील गावांमध्ये जाणारे वाहनचालक, नागरिक मोठ्या प्रमाणात त्रस्त झाले होते.