‘कर्णाचं चाक’ जिथं अडलं... तो हाच खड्डा
चिंचोटी-भिवंडी रस्त्याबाबत मिम्स आणि रीलचा भडिमार
विरार, ता. २९ (बातमीदार) ः चिंचोटी-भिवंडी रस्त्याबाबत गेल्या १५ वर्षांपासून अनेक आंदोलने, रास्ता रोको करण्यात आला. तरीही हा रस्ता होत नसल्याने सध्या या रस्त्याच्या दुरवस्थेवर मिम्स आणि रीलचा भडिमार सुरू आहे. यातून बांधकाम विभागावर ताशेरे ओढण्यात आले आहेत, तर एका रीलमध्ये महाभारतातील कर्णाच्या रथाचे चाक ज्या ठिकाणी अडकले तो खड्डा चिंचोटी-भिवंडी रस्त्यावरील असल्याचे सांगून प्रश्सासनाची खिल्ली उडवली आहे.
या रस्त्यावर आतापर्यंत अनेक दुर्घटना झाल्या आहेत. अनेकांचे जीव गेले आहेत, तर अनेक जण अपंग झाले आहेत. त्याचप्रमाणे पावसाळ्यानंतर उडणाऱ्या धुळीमुळे अनेकांना श्वसनासंबंधी त्रास सुरू झाले आहेत. शासन आणि प्रशासनाला जाग आणण्यासाठी आता तरुणाई पुढे सरसावली असून, त्यांनी समाजमाध्यमाचा आधार घेतला आहे. या प्रश्नाला ‘सकाळ’ने सातत्याने वाचा फोडली आहे.