पालघर, ता. २९ (बातमीदार) ः पालघर स्थानकाजवळील नवली फाटक रेल्वे प्रशासनाने बंद केला होता. त्यामुळे पूर्वेकडील नवलीसह परिसरातील अनेक गावांतील लोक, विद्यार्थ्यांना पालघर पश्चिमेकडे येण्यासाठी तीन किमीचा फेरा घालून रेल्वेस्थानकाकडे यावे लागत होते. अनेक अडचणींमुळे उड्डाणपुलाचे काम रखडले होते. आज (ता. २९) हा उड्डाणपूल नागरिकांसाठी खुला करण्यात आला आहे. त्यामुळे परिसरातील शेकडो नागरिकांना दिलासा मिळाला आहे.

रेल्वे फाटकाजवळ रेल्वे प्रशासनाने उड्डाणपूल बांधण्याचे काम सुरू होते; मात्र या कामामध्ये बाधा येत होती. काही दिवसांपूर्वी त्याचे काम पूर्ण झाले होते. त्यामुळे उड्डाणपूल नागरिकांसाठी खुला करावा, यासाठी या भागातील नागरिकांनी अनेक वेळा मोर्चे, आंदोलने केली. हा पूल सप्टेंबरअखेर खुला केला जाईल, असे प्रशासनाकडून सांगण्यात आले होते. त्याप्रमाणे सोमवारी हा पूल जनतेसाठी खुला करण्यात आला आहे. या पुलावरून सद्य:स्थितीत लहान वाहनांसाठी खुला करण्यात आला आहे. नगरसेविका हिंदवी पाटील, वीरेंद्र पाटील व ग्रामस्थांच्या पाठपुराव्यामुळे, तसेच वनमंत्री तथा पालघर जिल्ह्याचे पालकमंत्री गणेश नाईक यांच्या दरबारी, जिल्हाधिकारी, तसेच सार्वजनिक बांधकाम विभागाचे अधिकारी यांच्याकडे पाठपुरावा केल्यामुळे नवली उड्डाणपुलाचे काम पूर्ण झाले. या वेळी माजी नगरसेवक रवींद्र म्हात्रे, प्रवीण मोरे, दिनेश पाटील, सद्दाम शेख, संदेश पाटील, मुकेश दुबे, रत्नदीप पाखरे, मोहम्मद खोजा आदी उपस्थित होते.