उपजिल्हा रुग्णालयातील महिलांसाठी विशेष आरोग्य शिबिराला प्रतिसाद
रोहा, ता. ३० (बातमीदार) ः जिल्हा शल्यचिकित्सक डॉ. निशिकांत पाटील यांच्या मार्गदर्शनाखाली व वैद्यकीय अधीक्षक डॉ. सचिन गोमसाळे यांच्या नियोजनाद्वारे रोहा उपजिल्हा रुग्णालय येथे स्वस्थ नारी सशक्त परिवार अभियानांतर्गत जिल्हा विधी सेवा प्राधिकरण यांच्या सूचनेनुसार महिलांसह दिव्यांग बालकांची तपासणी, दिव्यांग प्रमाणपत्र वितरण व नूतनीकरण शिबिराचे आयोजन करण्यात आले होते.
शिबिराचे उद्‌घाटन अतिरिक्त जिल्हा शल्यचिकित्सक डॉ. शीतल जोशी-घुगे यांच्या हस्ते रोहा दिवाणी न्यायाधीश प्रथम वर्ग, संदीप खैरे यांच्या उपस्थितीत नुकतेच पार पडले. या शिबिरामधे महिलांचे रक्तदाब, मधुमेह, नेत्र, दंत रोग, स्तन व गर्भाशय मुख कर्करोग, गरोदर महिलांची प्रसूती पूर्व तपासणी, लसीकरण सेवा, रक्त व हिमोग्लोबिन तपासणी, हृदयरोग तपासणी, सिकल सेल आजार व रक्तक्षय तसेच प्याप स्मीयर व मॅमोग्राफी तपासणी करण्यात आली. या वेळी विशेष तज्ज्ञ‍ डॉक्टरांनी औषधोपचार व आवश्यक सल्ला दिला. निरोगी जीवनशैली आणि पोषणाबाबत गरोदर स्तनदा माता व लहान मुलांकरिता आहारविषयी सल्ला तसेच पौगंडावस्तेतील मुलींना मासिक पाळी स्वच्छतेबाबत माहिती देण्यात आली. सर्वसामान्य नागरिकांना महात्मा जोतिबा फुले आरोग्य योजना कार्ड, आभा कॉर्ड व महिलांना माता व बाल सुरक्षा कार्ड, प्रधानमंत्री मातृ वंदना कार्ड व रुग्णाना सिकल सेल कार्डचे वितरण करण्यात आले. तसेच पोषण ट्रॅकरमध्ये लाभार्थी नोंदणी, नि:क्षय मित्र स्वयंसेवक नोंदणी व अवयवदान नोंदणी केली गेली आहे. जिल्हा रुग्णालयातील तज्ज्ञ‍ डॉक्टरांनी उपस्थित राहून रुग्ण तपासणी व औषधोपचार केले.