करवाढीविरोधात महाविकास आघाडीचा आंदोलन इशारा
वाडा, ता. ३० (बातमीदार) ः नगरपंचायतीकडून निवासी व व्यापारी मालमत्तेच्या सुधारित कर आकारणीच्या नोटीसीचे वाटप करण्यात येत आह. यात अचानक झालेल्या करवाढीने येथील नागरिक हवालदिल झाले आहेत. याविरोधात करवाढ मागे घ्या अनयथा तीव्र आंदोलन छेडण्याचा इशारा महाविकास आघाडीने नगरपंचायत प्रशासनाला दिला आहे. याबाबत महाविकास आघाडीच्या शिष्टमंडळाने मुख्याधिकारी मनोज पष्टे यांची भेट घेऊन त्यांना निवेदन दिले आहे.
वाडा नगरपंचायत ही नव्याने स्थापन झालेली असून मालमत्ता व दिवाबत्ती करासोबतच वृक्ष, शिक्षण, रोजगार हमी, अग्निशमन, उपयोग कर्ता अशा अतिरिक्त करांचीही वाढ झाली आहे. या करामुळे नागरिक व व्यापारी हवालदिल झाले असून संताप व्यक्त केला आहे. ही करवाढ शिथिल करावी अन्यथा ६ ऑक्टोबर रोजी महाविकास आघाडीच्या वतीने नगरपंचायत कार्यालयासमोर आंदोलन छेडण्यात येईल, असा इशारा दिला आहे. यावेळी उध्दव ठाकरे पक्षाचे तालुका प्रमुख निलेश पाटील, मनसेचे कांतीकुमार ठाकरे, देवेंद्र भानुशाली, गणेश पाटील, युवराज ठाकरे, अमीन सेंदू, सुशील पातकर आदी महाविकास आघाडीचे पदाधिकारी उपस्थित होते.