कंटेनरच्या धडकेत दुचाकीस्वार महिलेचा मृत्यू
ठाणे, ता. ३० : घोडबंदर रोडवरील वाघबीळ उड्डाणपुलावर सोमवारी (ता. २९) रात्री साडेअकराच्या सुमारास भरधाव कंटेनरने दिलेल्या जोरदार धडकेत दुचाकीस्वार महिलेचा मृत्यू झाल्याची दुर्दैवी घटना घडली. मृत महिलेचे नाव आरती सुशील अग्रवाल (वय २७) असे आहे. आरती अग्रवाल या ओवळा नाका येथील हार्मोनियम सोसायटीत राहतात. त्या रात्री दुचाकीने घोडबंदर रोड मार्गे घरी जात असताना वाघबीळ उड्डाणपुलावर त्यांच्या दुचाकीला मागून भरधाव वेगाने आलेल्या कंटेनरने जोरदार धडक दिली. कंटेनर चालक दानिश मलिक याचे वाहनावरील नियंत्रण सुटल्यामुळे हा अपघात घडल्याची माहिती पोलिसांनी दिली.
या धडकेत आरती अग्रवाल गंभीर जखमी झाल्या. ठाणे वाहतूक पोलिसांनी तत्काळ त्यांना ठाणे जिल्हा शासकीय रुग्णालयात दाखल केले, मात्र डॉक्टरांनी त्यांना मृत घोषित केले. याप्रकरणी कासारवडवली पोलिस ठाण्यात कंटेनर चालकाविरोधात गुन्हा दाखल करण्यात आला असून, पुढील तपास वरिष्ठ पोलिस निरीक्षक निवृत्ती कोल्हटकर यांच्या मार्गदर्शनाखाली सुरू आहे.