रबाळे एमआयडीसीतील टीजेएसबी बँकेत दरोड्याचा प्रयत्न असफल
नवी मुंबई, ता. ३० (वार्ताहर) : रबाळे एमआयडीसीतील टीजेएसबी बँकेत रविवारी (ता. २८) पहाटेच्या सुमारास अज्ञात लुटारूंनी दरोडा टाकण्याचा प्रयत्न केला, मात्र त्यांचा हा प्रयत्न फसला.
बँकेच्या मागील बाजूची लोखंडी ग्रील कापून लुटारूंनी आत प्रवेश केला. त्यानंतर त्यांनी बँकेतील तिजोरी आणि एटीएम मशीन फोडण्याचा प्रयत्न केला. मात्र या दोन्ही गोष्टी फोडण्यात लुटारूंना यश आले नाही. त्यामुळे त्यांना रिकाम्या हाती पळून जावे लागले. सोमवारी (२९ सप्टेंबर) बँक कर्मचाऱ्यांच्या ही घटना निदर्शनास आली. त्यानंतर बँक व्यवस्थापकांनी रबाळे एमआयडीसी पोलिस ठाण्यात तक्रार दाखल केली. पोलिसांनी अज्ञात लुटारूंविरोधात गुन्हा दाखल केला असून, त्यांचा शोध सुरू आहे.
दोन वर्षांपूर्वी (एप्रिल २०२३)देखील याच बँकेत चोरीचा असाच प्रयत्न झाला होता. त्या वेळीही लुटारूंचा प्रयत्न फसला होता; मात्र त्यांनी सीसीटीव्ही कॅमेऱ्याचा डीव्हीआर चोरून नेला होता. पुन्हा त्याच बँकेला लक्ष्य करण्याचा हा प्रयत्न असफल झाला आहे.