अलिबाग- वडखळ रस्त्यावरील खड्ड्यांमध्ये पोहून अनोखे आंदोलन
अलिबाग, ता. ३० (वार्ताहर) ः अलिबाग-वडखळ महामार्गाची दुरवस्था दिवसेंदिवस भीषण होत असून वाहनचालक हैराण झाले आहेत. रस्त्यावर मोठमोठे खड्डे पडून त्यामध्ये पावसाचे पाणी साचले आहे. या डबक्यांमधून वाहन चालविताना अपघातांचा धोका निर्माण झाला आहे. त्यामुळे सोमवारी (ता. २९) एका वाहनचालकाने या डबक्यांमध्ये पोहून अनोखे आंदोलन करत शासनाचे लक्ष वेधले. या आंदोलनाद्वारे संबंधित तरुणाने लोकप्रतिनिधी व शासनाचा निषेध नोंदविला.
अलिबाग हे प्रसिद्ध पर्यटन स्थळ असून येथे देश-विदेशातून पर्यटक मोठ्या संख्येने येतात. मात्र या मार्गावरील खड्डेमय रस्त्यामुळे पर्यटकदेखील त्रस्त झाले आहेत. त्यामुळे स्थानिक नागरिक, पर्यटक व प्रवासी यांचे मोठे नुकसान होत आहे. अलिबाग- वडखळ मार्गावरील खड्डे भरण्यासाठी २८ लाखांचा निधी मंजूर झाला असून राष्ट्रीय महमार्ग सार्वजनिक बांधकाम विभागाकडून ठेकेदारही नेमण्यात आला आहे. मात्र या ठेकेदाराकडून खड्डे भरताना अतिशय निकृष्ट दर्जाचे काम करण्यात आले आहे. त्यामुळे शासनाचा २८ लाखांचा निधी पाण्यात गेला आहे. अलिबाग हे मुंबई, पुण्यापासून जवळचे पर्यटनस्थळ असल्याने येथे मोठ्या संख्येने पर्यटक येत असतात. पावसाळ्याच्या दिवसात जलवाहतूक बंद असल्याने पर्यटक आपल्या वाहनाने अलिबाग- वडखळ मार्गावरून येत असतात. मात्र या रस्त्यावरील खड्डयांमुळे त्यांनाही त्रास होत आहे. त्यामुळे शासनाने या गंभीर प्रश्नाकडे तातडीने लक्ष देऊन रस्त्याची दुरुस्ती करावी, अशी मागणी जोर धरीत आहे.