जुन्या चाळींच्या पुनर्विकासासाठी कार्यशाळा
सकाळ वृत्तसेवा
मुंबई, ता. २ : मुंबईतील जुन्या चाळींचा पुनर्विकासाचा प्रश्न दिवासागणिक जटिल होत चालला आहे. यासाठीच मुंबई मराठी पत्रकार संघ आणि एच. डी. गावकर सेवा संस्था यांच्या संयुक्त विद्यमाने जुन्या चाळी व गृहनिर्माण सोसायट्यांच्या पुनर्विकास प्रक्रियेवर मार्गदर्शन करणारी मोफत कार्यशाळा आयोजित करण्यात आली आहे. सदरची कार्यशाळा शनिवारी (ता. ४) सायंकाळी ४.३० वाजता मुंबई मराठी पत्रकार संघाच्या आझाद मैदानाजवळील पत्रकार भवनाच्या सभागृहात होणार आहे. या कार्यशाळेत सर्व नागरिकांना मोफत प्रवेश असणार आहे.
मध्य आणि दक्षिण मुंबईतील दादर, परळ, लालबाग, शिवडी परिसरात असलेल्या अनेक जुन्या चाळी व सोसायट्या पुनर्विकासाच्या टप्प्यावर आहेत. या प्रक्रियेत कायदेशीर मार्गदर्शन, पारदर्शकता आणि वाद टाळण्यासाठी योग्य माहिती मिळणे अत्यंत गरजेचे आहे. त्यासाठीच या कार्यशाळेचे आयोजन करण्यात आले आहे. या कार्यक्रमात महाराष्ट्र राज्य सहकारी गृहनिर्माण संस्था आणि अपार्टमेंट्स महासंघाचे तज्ज्ञ संचालक अ‍ॅड. श्रीप्रसाद परब पुनर्विकास प्रक्रियेवरील कायदेशीर बाबींवर मार्गदर्शन करतील, तर ज्येष्ठ पत्रकार कुमार कदम रहिवाशांची सामाजिक जबाबदारी या विषयावर विचार मांडतील. तसेच प्रश्नोत्तराचे विशेष सत्रही होणार आहे.