मालाडमधील विकास योजनेतील रस्‍त्‍याचे उद्‌घाटन
मुंबई, ता. २ ः कांदिवली पूर्व विधानसभा मतदारसंघातील ब्लिस कंपाउंड (मालाड पूर्व) येथील विकास योजनेतील रस्‍त्‍याचे (डीपी रोड) उद्‌घाटन आमदार अतुल भातखळकर यांच्या हस्ते करण्यात आले.
गेल्या १० ते १२ वर्षांत मतदारसंघात विविध विकासकामे हाती घेण्यात आली. त्यातही विकास योजनेतील अनेक रस्‍त्‍यांवर अतिक्रमणे आणि अनधिकृत बांधकामे होती. नागरिकांच्या मागणीची आणि तक्रारींची दखल अशा रस्‍त्‍यांसदर्भातील समस्या सोडवण्यात आल्या. नवरात्री आणि दसऱ्याच्या निमित्ताने नागरिकांच्या सोयीसाठी विकास योजनेतील रस्‍त्‍याची भेट देण्यात आली आहे, असे भातखळकर यांनी या वेळी सांगितले.
पंतप्रधान नरेंद्र मोदी यांच्या नेतृत्वात २०१४ पासून देशभरात अनेक विकास प्रकल्प आणि जनहिताच्या योजना राबवण्यात आल्या. सर्व योजना आज थेट लाभार्थ्यांपर्यंत पोहोचल्या आहेत. तसेच महाराष्ट्रात मुख्यमंत्री देवेंद्र फडणवीस यांच्या नेतृत्वाखाली मेट्रोचे जाळे विणण्यात आले. नागरिकांना या सुविधांचा लाभ मिळाला आहे, असे भातखळकर यांनी सांगितले.