आयएनएस इंफाळ आणि युएसएस ग्रिडलीचा संयुक्त सराव

सकाळ वृत्तसेवा
मुंबई, ता. २ : भारतीय नौदलाची स्वदेशी बनावटीची क्षेपणास्त्र विध्वंसक नौका आयएनएस इंफाळ हिने अमेरिकन नौदलाच्या युएसएस ग्रिडली या युद्धनौकेसोबत अरबी समुद्रात संयुक्त सराव केला. हा ‘पासेज एक्सरसाइज’  मंगळवारी (ता. २९) घेण्यात आला होता. या सरावात युद्धनौकांची हालचाल कशी समन्वयाने करायची, दोन्ही जहाजांमधील हेलिकॉप्टरची उड्डाणे, समुद्रातील दरोडेखोरांविरोधात कारवाई (व्हीबीएसएस प्रशिक्षण) तसेच एकमेकांचे अनुभव आणि पद्धती शिकण्याचे प्रशिक्षण घेण्यात आले. अशा प्रकारच्या सरावामुळे दोन्ही देशांच्या नौदलामध्ये परस्पर समन्वय वाढतो आणि भविष्यातील संयुक्त मोहिमांमध्ये कार्यक्षमता अधिक सुधारते. सराव संपल्यानंतर दोन्ही नौका आपापल्या नियोजित मोहिमेसाठी पुढे गेल्या. भारत आणि अमेरिकेमधील समुद्री सहकार्य बळकट करण्यासाठी अशा संयुक्त सरावांना मोठे महत्त्व असल्याचे नौदल अधिकाऱ्यांनी सांगितले.