मिनी मॅरेथॉन स्पर्धेला उत्स्फूर्त प्रतिसाद
कल्याण, २ (वार्ताहर) : युवा संस्कार बहुउद्देशीय संस्थेने दहिवलीत “एक धाव आरोग्यासाठी” या उपक्रमाअंतर्गत दसरा आणि महात्मा गांधी जयंतीनिमित्त मिनी मॅरेथॉनचे आयोजन केले. या स्पर्धेचा मुख्य हेतू मुलांना रोज धावण्याची सवय लावणे आणि आरोग्यदायी जीवनशैली अंगीकारण्यास प्रोत्साहन देणे हा होता. मॅरेथॉनमध्ये बालवाडीपासून दहावीपर्यंतच्या विद्यार्थ्यांनी मोठ्या संख्येने भाग घेतला. मुलांना वयगटांनुसार बालवाडी, पहिली ते चौथी, पाचवी ते सातवी आणि आठवी ते दहावी अशा गटांमध्ये स्वतंत्र शर्यती घेतल्या गेल्या. प्रत्येक गटातील प्रथम तीन क्रमांकधारकांना बक्षिसे प्रदान करण्यात आली. कार्यक्रमात दहिवली गावचे सरपंच कमलाकर राऊत, तसेच ग्रामस्थ मोठ्या संख्येने उपस्थित होते. सोमनाथ राऊत यांनी मुलांना मोबाईल व टीव्हीवर वेळ घालवण्यापेक्षा व्यायाम व धावण्याची सवय लावण्याचा सल्ला दिला. या उपक्रमामुळे गावात आरोग्याविषयी जनजागृती झाली असून, मुलांमध्ये खेळ आणि व्यायामाविषयी आवड वाढल्याचे दिसून आले.