मनोर, ता. २ (बातमीदार) : विक्रमगड तालुक्यातील भोपोली-सोमटा रस्त्यावरील वेढे गावातील ग्रामपंचायत कार्यालयाच्या जुन्या इमारतीत एका मजूर दाम्पत्याला १४ जणांच्या टोळीने मारहाण केली. या प्रकरणी मनोर पोलिस ठाण्यात गुन्हा दाखल करण्यात आला आहे. पोलिसांकडून संशयित आरोपींचा शोध घेतला जात आहे.

फिर्यादी दाम्पत्य ग्रामपंचायतीच्या इमारतीत साफसफाई करीत असताना गणेश दुमाडा आणि दिनेश दुमाडा यांनी लाथाबुक्यांनी मारहाण करून इमारतीबाहेर हाकलून दिले. यानंतर मोतीराम डोले, लाल्या राबडे, कृष्णा राबडे, रामु वाघात, हिरा दुमाडा, मंगेश डोले, विष्णू राबडे, रामनाथ राबडे, निर्मला दुमाडा, केपुजा दुमाडा, मंजू राबडे आणि काकड्या राबडे यांनी फिर्यादीला वर्गणी न दिल्याच्या कारणावरून लाथाबुक्यांनी मारहाण केली. या वेळी लाल्या राबडे याने महिलेसोबत अश्लील वर्तन केले. या प्रकरणी महिलेने मनोर पोलिस ठाण्यात दिलेल्या फिर्यादीवरून दिनेश दुमाडा, गणेश दुमाडा यांच्यासह १४ संशयित आरोपींविरोधात गुन्हा दाखल करण्यात आला आहे.