धम्मचक्र प्रवर्तनदिनी चैत्यभूमीवर अभिवादनासाठी गर्दी

मुंबई, ता. २ : धम्मचक्र प्रवर्तन दिनानिमित्त गुरुवारी (ता. २) आंबेडकरी अनुयायांनी दादर येथील चैत्यभूमीवर डॉ. बाबासाहेब आंबेडकर यांना अभिवादन करण्यासाठी पहाटेपासूनच गर्दी केली होती. यासाठी भारतीय बौद्ध महासभेने अनुयायांसाठी चोख व्यवस्था केली होती. भारतरत्न डॉ. बाबासाहेब आंबेडकर यांनी विजयादशमीच्या दिवशी लाखो अनुयायांसह नागपूर येथे बौद्ध धम्माची दीक्षा घेतली. त्यामुळे हा दिवस धम्मचक्र प्रवर्तन दिवस म्हणून बौद्ध अनुयायी साजरा करतात. नागपूर येथे जाणे शक्य नसल्याने सकाळपासून आंबेडकरी अनुयायी चैत्यभूमी येथे अभिवादन करण्यासाठी येत होते. अनुयायी चैत्यभूमीवर दाखल होत होते. यामध्ये तरुणांची संख्या मोठी होती. या वेळी समता सैनिक दलाने धम्म ध्वजाला सलामी दिली. चैत्यभूमी फुलांनी सजविण्यात आली होती. भदन्त राहुल बोधी महाथेरो यांनी चैत्यभूमीवर २२ प्रतिज्ञांचे वाचन केले. डॉ. बाबासाहेब आंबेडकर महापरिनिर्वाण समन्वय समितीचे नागसेन कांबळे यांच्यासह पदाधिकाऱ्यांनी चैत्यभूमीवर व्यवस्था पाहिली.