वज्रेश्वरी (बातमीदार) : भिवंडी तालुक्यातील वज्रेश्वरी योगिनी देवी संस्थानमध्ये नवरात्रोत्सवाचा समारोप विजयादशमीनिमित्त देवीची पालखी मिरवणुकीने मोठ्या थाटामाटात आणि ढोल-ताशांच्या गजरात साजरा करण्यात आला. वज्रेश्वरी या तिर्थस्थळात नऊ दिवसांपासून देवीचा नवरात्रोत्सव पारंपरिक पद्धतीने चालत होता. या काळात काकड आरती, धार्मिक कार्यक्रम, रामकथा, महाभिषेक, भजन-कीर्तन अशा विविध धार्मिक सोहळे पार पडले. विजयादशमीच्या दिवशी देवीचा चोखा होम झाला. भाविकांसाठी महाप्रसाद ठेवला होता. संध्याकाळी ५ वाजता संस्थानाचे विश्वस्त धनेश गोसावी यांच्या नेतृत्वाखाली देवीची विधिवत पूजा-अर्चना करून पालखी मिरवणुकीची सुरुवात झाली. पालखी सोहळ्यात वज्रेश्वरी योगिनी देवी संस्थानचे विश्वस्त, ग्रामस्थ व भाविक मोठ्या संख्येने सहभागी झाले. वज्रेश्वरी मंदिरापासून परिसरापर्यंत पालखी मिरवली गेली. मिरवणुकीत भक्तांनी आपट्यांवर पानांची पूजा करून, ढोल-ताशांचा गजर करत, गुलाल उधळून दसऱ्याचा उत्सव जल्लोषात साजरा केला. या वेळी ग्रामस्थांमध्ये उत्साहाचे वातावरण पाहायला मिळाले आणि पालखी मिरवणुकीने परिसरात भक्तीचा ठसा उमटवला.