देवभक्ताने लुबाडले लाखोंचे दागिने
नवी मुंबई, ता. ४ (वार्ताहर) ः जेजुरीच्या देवभक्तीचा आव आणून एका भामट्याने वाशीतील महिलेचे तब्बल आठ लाख ५५ हजारांचे सोन्याचे दागिने लंपास केले आहेत. याप्रकरणी वाशी पोलिस ठाण्यात फसवणुकीचा गुन्हा दाखल करण्यात आला आहे.
उरणमधील डाउरनगर भागात राहणारा दीपक पाटील याची वाशीमध्ये राहणाऱ्या ४५ वर्षीय महिलेसोबत प्रवासादरम्यान ओळख झाली होती. या वेळी दीपकने स्वतःला जेजुरीचा भक्त असल्याचे सांगत प्रसाद म्हणून बर्फीचा तुकडा दिला. त्यानंतर महिलेशी मोबाईलवर संपर्क साधत वारंवार ‘तू माझी बहीण आहेस, देव प्रसन्न होईल,’ असे गोड बोलून विश्वास संपादन केला होता. १२ जानेवारी २०२४ रोजी दीपकने शिक्षणासाठी पैशांची गरज असल्याचे सांगून महिलेकडे दागिने मागितले. तसेच सोनाराकडून डबल वजनाचे करून देण्याचे आश्वासन दिले. त्यावर विश्वास ठेवताना पाच तोळ्यांचा हार, सोन्याची अंगठी, झुमके दिले होते; पण काही दिवसानंतर दागिने परत करण्यास टाळाटाळ करू लागला. त्यामुळे याप्रकरणी तक्रार दाखल करण्यात आली होती.