सेंट ऑगस्टिन हायस्कूलमध्ये आजी-आजोबा दिन उत्साहात
नेरूळ, ता. ५ (बातमीदार) ः सेंट ऑगस्टिन हायस्कूल, नेरूळ येथे शनिवारी (ता. ४) हृदयस्पर्शी आजी-आजोबा दिन साजरा करण्यात आला. विद्यार्थ्यांच्या आणि त्यांच्या कुटुंबीयांच्या जीवनात आजी-आजोबांचे महत्त्व अधोरेखित करण्यासाठी हा कार्यक्रम मोठ्या उत्साहात पार पडला. कार्यक्रमाची सुरुवात प्रभू प्रार्थना, बायबल वाचन आणि विशेष उपासनेने झाली. इयत्ता तिसरीच्या विद्यार्थ्यांनी स्वागतगीत सादर करून उपस्थितांचे मन जिंकले. विद्यार्थ्यांनी कोळी नृत्य, मेलडी नृत्य आणि आजी-आजोबांना समर्पित संगीतमय ऑर्केस्ट्राद्वारे भारतीय संस्कृतीचे दर्शन घडवले.
आजी-आजोबांनीही विविध खेळांत उत्साहाने भाग घेतला. विजेत्यांना बक्षिसे प्रदान करण्यात आली. विद्यार्थ्यांनी स्वतः बनवलेल्या शुभेच्छापत्रांचे वितरण करून प्रेम आणि कृतज्ञतेची अभिव्यक्ती केली. मुख्याध्यापिका समीरा माने यांनी आजी-आजोबांना शुभेच्छा देत मुलांच्या संगोपनात त्यांची भूमिका अधोरेखित केली. या सोहळ्याने सर्वांच्या मनात गोड आठवणी आणि पिढ्यांतील बंध अधिक दृढ केले.