६ ऑक्टोबर रोजी कोजागरी पौर्णिमा साजरी करा ः दा. कृ. सोमण
ठाणे, ता. ५ (बातमीदार) ः यंदाची आश्विन पौर्णिमा सोमवारी (ता. ६) साजरी केली जाईल, असे ज्येष्ठ पंचांगकर्ते दा. कृ. सोमण यांनी सांगितले. या रात्री पौर्णिमा योग आहे. लक्ष्मीपूजन, उपवास, जागरण आणि दिव्यांची रोषणाई या गोष्टींना या दिवशी विशेष महत्त्व आहे. दा. कृ. सोमण म्हणाले, जागरण म्हणजे फक्त झोप न येणे नव्हे, तर अज्ञान, आळस, अंधश्रद्धा आणि अनीती यांच्यापासून जागे होणे हे खरे जागरण आहे. ही पौर्णिमा पावसाळ्यानंतरची पहिली पौर्णिमा असल्यामुळे आकाश निरभ्र आणि चंद्र तेजस्वी असतो. यामुळे, चांदण्यात कुटुंब आणि मित्रांसोबत वेळ घालवण्याची परंपरा आहे. हे निसर्गाशी एकरूप होण्याचेच प्रतीक आहे, असेही त्यांनी सांगितले.