स्वतंत्र पोलिस ठाण्याला मंजुरी
विमानतळासाठी १.७६ कोटी अनावर्ती खर्चास मान्यता
नवी मुंबई, ता.७ (वार्ताहर): नवी मुंबई आंतरराष्ट्रीय विमानतळ परिसरातील सुरक्षेच्या दृष्टीने स्वतंत्र पोलिस ठाणे स्थापन होणार आहे. राज्य शासनाने त्यासाठी मंजुरी दिली असून विविध संवर्गातील १०८ पदे निर्माण करण्यात येणार आहेत.
जुलै महिन्यामध्ये नवी मुंबई पोलिस आयुक्तालयाची पुनर्चना करण्यात आली आहे. या पुनर्चनेत परिमंडळ-१ (वाशी) व परिमंडळ-२ (पनवेल) यांच्या पुनर्रचनेतून नवे तिसरे परिमंडळ-२ (बेलापूर) स्थापन करण्यात आले आहे. तर विमानतळ आणि त्याच्या आजुबाजुच्या परिसराची कायदा व सुव्यवस्था राखण्यासाठी नवी मुंबई आंतरराष्ट्रीय विमानतळ पोलिस ठाणे प्रस्तावित करण्यात आले होते. त्यानुसार सोमवारी राज्याच्या गृह विभागाने नवी मुंबई आंतरराष्ट्रीय विमानतळासाठी स्वतंत्र पोलिस ठाण्याला मंजुरी दिली आहे. त्याबाबतचा जीआर प्रसिद्ध करण्यात आला आहे. या नवीन पोलिस ठाण्यामुळे पनवेल, उलवे, नव्याने स्थापन होणाऱ्या आंतरराष्ट्रीय विमानतळ पोलिस ठाण्याच्या हद्द निश्चितीचा प्रस्ताव नवी मुंबई पोलिस आयुक्तालयाकडून लवकरच शासनास सादर करण्यात येणार आहे.
---------------------------------
१०८ पदांचा समावेश
नवी मुंबई आंतरराष्ट्रीय विमानतळ पोलिस ठाण्यासाठी दोन पोलिस निरीक्षक, ३ सहायक पोलिस निरीक्षक, ६ पोलिस उप निरीक्षक, ६ सहायक पोलिस उपनिरीक्षक, २७ पोलिस हवालदार, ४२ पोलिस शिपाई, १९ महिला पोलिस शिपाई, ३ चालक पोलिस शिपाई अशा १०८ पदांचा समावेश आहे.