मुंबई ः आंतरराष्ट्रीय विमानतळावर बँकॉक, श्रीलंकेहून परतलेल्या प्रवाशांनी तस्करीच्या हेतूने वाहून आणलेला सहा कोटींचा परदेशी गांजा, दुर्मिळ वन्य प्राणी आणि ड्रोन कस्टम विभागाने जप्त केले. ४ ऑक्टोबरला या कारवाया करण्यात आल्या. बँकॉकहून आलेल्या तीन प्रवाशांनी प्रत्येकी दोन कोटींचा गांजा सामानात दडवून आणला होता, तर अन्य कारवाईत बँकॉकहून आलेल्या प्रवाशाच्या सामानात मंकी स्क्वीरलसारखे ३६ दुर्मिळ वन्यप्राणी आढळले. प्रवासादरम्यान चार प्राण्यांचा मृत्यू झाला, तर दोन प्राण्यांची प्रकृती चिंताजनक आहे. अन्य कारवाईत डीजेआय ब्रँडचे ड्रोन वाहून आणणाऱ्या प्रवाशास अटक करण्यात आली. हा प्रवासी श्रीलंकेच्या कोलंबो विमानतळावरून मुंबईत परतला होता. त्याच्याकडून जप्त मुद्देमालाची किंमत ३२ लाख इतकी असल्याचे सांगण्यात आले.