नागरी सुविधांसाठी दिवाळीनंतर आंदोलन
डंपिंग, रस्त्यांची दुरावस्था, स्मशानभूमी प्रश्नी ग्रामस्थ आक्रमक
कल्याण, ता. १८ (वार्ताहर) ः कल्याण डोंबिवली पालिकेच्या प्रभाग क्रमांक १ उंबर्डे गाव परिसरातील डंपीग ग्राउंडमधील कचऱ्याचा त्रास होत असून उंबर्डेगाव, हिऱ्याचा पाडा, कोळीवली, गांधारी परिसरातील नागरिकांचे आरोग्य धोक्यात आले आहे. त्याचप्रमाणे या प्रभागात रस्त्यांची दुरावस्था आहे. तर, काही गावांना स्मशानभूमी देखील नाही. याबाबत महापालिका प्रशासनाने दखल घेऊन तातडीने काम सुरु करावे अन्यथा दिवाळीनंतर ग्रामस्थ आंदोलन करतील, असा इशारा भाजपचे ओबीसी सेल कल्याण शहर अध्यक्ष शत्रुघ्न भोईर यांनी आयुक्तांना दिला आहे.
शत्रुघ्न भोईर यांनी म्हणाले की, उंबर्डे येथील प्रक्रिया प्रकल्पात कचऱ्याचा ढिगारा साचला आहे. यामुळे बाहेरच्या बाजूलाही कचरा पडतो आणि भात शेतीवर परिणाम होतो. याशिवाय कचऱ्याचे काळे पाणी, केमिकल मिश्रीत पाणी जनावरे पितात त्यामुळे त्याचा जीव धोक्यात आला आहे. तर काही जनावरांचा मृत्यू देखील झाला आहे. नागरिकांचे आरोग्य देखील धोक्यात आले आहे.
कोळीवली, गांधारी, हिऱ्याचा पाडा परिसरात स्मशानभूमी नसल्याने अंत्यविधी उघड्यावर करावी लागते. सापाड येथील स्मशानभूमीचा दुरावस्था झाली आहे. लाईट, पाणी, सुविधा स्मशानभूमवीत नाही. तर, टुव्हीलर गाडीची लाईट लावून अंत्यविधी करावा लागतो. महापालिकेत गावे असुनही काही उपयोग नाही सोयी सुविधा पासून वंचित राहवे लागते. महापालिका प्रशासनाने या समस्यांची दखल घेऊन पुढील कार्यवाही करावी अन्यथा दिवाळीनंतर ग्रामस्थ जन आंदोलन करतील, असा इशारा भाजपाच्या शत्रुघ्न भोईर यांनी दिला आहे.