मनसे देणार खड्डे सम्राट पुरस्कार
नेरूळ, ता. १८ (बातमीदार) ः नवी मुंबई पालिकेने कोट्यवधी रुपये खर्चून रस्ते बांधले. परंतु, निकृष्ट दर्जाचे साहित्य वापरल्यामुळे नवी मुंबईतील रस्त्यांवर जागोजागी खड्डे पडले आहे. काही मुख्य रस्त्यावरील खड्डे पाच-पाच वेळा तात्पुरती मलमपट्टी करून बुजविण्यात येऊन सुद्धा पुन्हा तेथे खड्ड्यांचे साम्राज्य पसरले आहे. मुख्य रस्त्यांवरील खड्डे अभियांत्रिकी विभागामार्फत वेळोवेळी बुजविण्यासाठी लाखो रुपये खर्च केले जातात. परंतु, अंतर्गत रस्त्यावरील खड्ड्यांबाबत कमालीचे दुर्लक्ष केले जाते. यामुळे नागरिकांना नाहक त्रासाला सामोरे जावे लागते. याविरोधात मनसे आक्रमक झाली असून महापालिका अभियंत्यांना ते निषेधात्मक खड्डे सम्राट पुरस्कार मनसेने जाहीर केला आहे. महाराष्ट्र नवनिर्माण सेनेतर्फे खड्डे सम्राट हा पुरस्कार प्रदान करण्यात येणार आहे, असे पत्र मनसेने मुख्य अभियंता शिरीष आरदवाड यांना देऊन पुरस्कार स्वीकारण्यासाठी वेळ मागितली आहे.