डॉ. सुरेश एकलहरे यांचे निधन
कल्याण, ता. १९ (वार्ताहर) ः ज्येष्ठ सामाजिक कार्यकर्ते डॉ. सुरेश एकलहरे यांचे शनिवारी (ता. १८) सायंकाळी वृद्धापकाळाने निधन झाले. त्यांच्या निधनाने कल्याणच्या वैद्यकीय तसेच सामाजिक क्षेत्रात हळहळ व्यक्त होत आहे. डॉ. एकलहरे यांनी अनेक वर्षे कल्याण शहरात रुग्णसेवा केली. गरीब आणि वंचित घटकांच्या आरोग्यसेवेसाठी त्यांनी आपले आयुष्य अर्पण केले. ते केवळ वैद्य म्हणून नव्हे, तर सामाजिक जाण असलेले कार्यकर्ते म्हणूनही ओळखले जात. डॉ. एकलहरे हे कल्याणमधील अनेक संस्थांमध्ये सक्रिय होते. यात शुक्ल यजुर्वेदी माध्यंदिन ब्राह्मण संस्था, याज्ञवल्क्य संस्था, सोशल सर्व्हिस लीग, कल्याण संस्कृती मंच, सदिच्छा अपंग पुनर्वसन केंद्र, डॉ. आनंदीबाई जोशी लोकविद्यालय आणि बालकल्याण संस्था अशा विविध संस्थांचा समावेश आहे. सामाजिक कार्यातील त्यांच्या सातत्यपूर्ण योगदानाबद्दल सार्वजनिक गणेशोत्सव सुभेदार वाडा समितीकडून त्यांना मानाचा शताब्दी पुरस्कारही देण्यात आला होता. त्यांच्या पश्चात पत्नी, मुलगा आणि मुलगी असा परिवार आहे. डॉ. एकलहरे यांच्या निधनाने कल्याण शहरातील सामाजिक आणि वैद्यकीय क्षेत्राने एक संवेदनशील व्यक्तिमत्त्व गमावल्याची भावना व्यक्त होत आहे.