पालघर, ता. २१ (बातमीदार) : जिल्ह्यातील ९० टक्के भातशेतीचे नुकसान झाले आहे. त्यांना अजूनही मदत मिळालेली नाही. तसेच राज्यात तातडीने ओला दुष्काळ जाहीर करून शेतकऱ्यांना कर्जमाफी व विशेष मदत पॅकेज जाहीर करावे, या मागण्यांकडे सरकारचे लक्ष वेधण्यासाठी किसान काँग्रेसचे महाराष्ट्र प्रदेशाध्यक्ष पराग पष्टे उद्या (ता. २२) पालघर जिल्हाधिकारी कार्यालयासमोर एक दिवसाच्या उपोषणाला बसणार आहेत.

राज्य सरकारने मदत जाहीर केली आहे, मात्र आता दिवाळी संपत आली तरी अजूनही शेतकऱ्याला भरपाई मिळालेली नाही. आज शेतकऱ्याला काळी दिवाळी साजरी करावी लागते. अनेक शेतकरी आर्थिक विवंचनेतून टोकाचे पाऊल उचलत आहेत, याकडे लक्ष वेधण्यासाठी उपोषणाला बसत आहे, असे पष्टे यांनी सांगितले.

पावसाचा धुमाकूळ

वाडा/विक्रमगड (बातमीदार) : मेघगर्जनेसह मुसळधार पावसाने आज (ता. २१) सायंकाळच्या सुमारास हजेरी लावत वाडा, विक्रमगड तालुक्याला चांगलेच झोडपले. यामुळे शेतात कापून ठेवलेल्या भातपिकाचे नुकसान झाले. दिवाळीच्या खरेदीसाठी महिला घराबाहेर पडल्या होत्या, मात्र पावसाने त्यांचीही तारांबळ उडाली.