पोयनाड बाजारपेठेत दिवाळीचा उत्साह
पोयनाड, ता. २१ (बातमीदार) : दिवाळी सणाचा उत्साह अलिबाग तालुक्यातील पोयनाड बाजारपेठेत दिसून आला. दिवाळी पाडवा, भाऊबीजचे औचित्य साधत खरेदीसाठी ग्राहकांची मोठी गर्दी दिसून आली.
पोयनाड बाजारपेठेत प्रामुख्याने आजूबाजूच्या गावातील नागरिक मोठ्या संख्येने येतात. विविध प्रकारच्या वस्तूंची दुकाने, सामान, कपड्याची दुकाने यांची संख्या मोठी असल्याने मागील काही दिवसांपासून खरेदीसाठी गर्दी दिसून आली. सोमवारी आठवडा बाजार आल्याने दिवाळीसाठी लागणारा भाजीपाला, कांदे-बटाटी, लसूण, पालेभाज्या खरेदीला ग्राहकांनी मोठी गर्दी केली होती. यंदा जीवनावश्यक वस्तूंवरील जीएसटी दर कमी झाल्याने खरेदीला ग्राहकांचा चांगला प्रतिसाद मिळाल्याचे व्यापाऱ्यांनी सांगितले. सोन्याचे दर सव्वा लाखाच्या पुढे आणि चांदीचे दर दोन लाखांच्या पुढे गेलेले असले तरी पोयनाड बाजारपेठेतील ज्वेलर्सच्या दुकानांमध्ये दिवाळीच्या शुभ मुहूर्तावर खरेदीला प्रतिसाद दिसून आला.