स्वराज्य समूहाने साकारला खांदेरी-उंदेरी जलदुर्ग
कल्याण, ता. २३ (वार्ताहर) : संस्कृती आणि परंपरांनी समृद्ध असलेल्या डोंबिवली शहरात यंदाही किल्ल्यांची परंपरा जपली जात आहे. दिवाळी सणाचे औचित्य साधून डोंबिवली पूर्वेकडील श्री विवेकानंद सोसायटी, सारस्वत कॉलनी येथील ''स्वराज्य ग्रुप''ने जलदुर्ग प्रकारातील खांदेरी-उंदेरी किल्ल्यांची सुंदर प्रतिकृती साकारली आहे.
खांदेरी किल्ला छत्रपती शिवाजी महाराजांनी १६७९ मध्ये बांधला, तर उंदेरी किल्ला सिद्दींनी बांधला होता. मराठा आरमाराच्या सागरी टेहळणीसाठी हे दोन्ही किल्ले अत्यंत महत्त्वाचे होते. विशेष म्हणजे, अलीकडेच या किल्ल्यांचा ''मराठा लष्करी लँडस्केप्स'' अंतर्गत युनेस्कोच्या जागतिक वारसा यादीत समावेश करण्यात आला आहे. स्वराज्य ग्रुपने २७ x १८ फूट लांबीची ही प्रतिकृती साकारून याच महत्त्वपूर्ण घटनेला उजाळा दिला आहे.