वाडा, ता. २३ (बातमीदार) ः तालुक्यातील ग्रामीण भागातील शेतकऱ्यांनी वर्षानुवर्षे चालत आलेली कृषी परंपरेची आगळीवेगळी दिवाळी अनेक दुःखावर पांघरूण घालत बुधवारी (ता. २२) मोठ्या उत्साहात साजरी केली.

लक्ष्मीपूजनाच्या मुहूर्तावरच परतीच्या पावसाने जोरदार बॅटिंग करून हातातोंडाशी आलेल्या पिकाची मोठ्या प्रमाणात नासाडी केली आहे; परंतु आपल्या संस्कृतीचे जतन व रक्षण करण्यास शेतकऱ्यांनी कुठलीच कसर सोडलेली नाही. शेतकरी अनेक संकटांवर मात करून आपले सण-उत्सव साजरे करीत असतात. खास करून मांगाठणे येथील शेतकरी अनेक वर्षांपासून रेड्यांच्या झुंजी भरवून कष्ट करून शिणलेल्या शेतकऱ्यांच्या आनंदात भर घालत असतात. या दिवाळीत गावातील शेतकऱ्यांनी एकत्रित येऊन बैलांना रंगीबेरंगी रंगांनी, फुग्यांनी व झेंडूच्या माळांनी सजवून गावभर जनावरांची मिरवणूक काढून दिवाळी साजरी केली. दिवाळीची सुरुवात म्हणून घरासमोरील अंगणात देवाचे, भाताचे कणीस, निसर्गाची चित्रे काढून पूजा केली जाते. आज ग्रामीण भागात दिवाळीनिमित्त भारतीय संस्कृती व परंपरेचा उत्साह कायम टिकून असल्याचे दिसून आले.