वाडगावमध्ये भेकर प्राण्याचे मांस जप्त
अलिबाग, ता. २४ (वार्ताहर) : तालुक्यातील वाडगाव येथे एका घरात भेकर (संरक्षित वन्यजीव प्राणी) प्राण्याचे मांस अलिबाग पोलिसांनी वन विभागाच्या मदतीने गुरुवारी (ता. २३) कारवाई करून जप्त केले आहे. याप्रकरणी आरोपी जयेंद्र काशिनाथ भगत याच्याविरोधात वन अधिकाऱ्यांकडून गुन्हा दाखल करण्यात आला आहे.
पोलिसांना आरोपी जयेंद्र याने फणसाड अभयारण्यातील भेकरची शिकार करून मांस घरात बाळगल्याची माहिती मिळाली. याआधारे त्यांनी वाडगाव येथील आरोपीच्या घरी छापा टाकला. यात त्याच्या घरातून सुमारे एक किलो वजनाचे भेकर प्राण्याचे मांस जप्त करत पुढील कारवाईसाठी वन विभागाच्या ताब्यात देण्यात आले. शिकार करताना आरोपीसोबत आणखी कोण साथीदार होते, याचा शोध पोलिस आणि वन विभाग घेत आहेत. संरक्षित वन्यजीव प्राण्यांची शिकार न करण्याचे आणि त्यांचे मांस बाळगू नये, असे आवाहन पोलिस व वन विभागाने केले आहे. या कारवाईत पोलिस निरीक्षक एस. व्ही. लांडे (अति. कार्यभार अलिबाग), सहा. पोलिस निरीक्षक सरिता मुसळे हवालदार प्रदीप देशमुख, जितेंद्र चवरकर, पोलिस शिपाई गणेश पारधी, सागर गोळे यांनी सहभाग घेतला होता.