हृदयविकाराच्या झटक्याने तरुणाचा मृत्यू
कर्जत, ता.२५ (बातमीदार)ः नेरळहून कारने घरी परतत असताना हृदयविकाराच्या झटक्याने एका ३० वर्षीय तरुणाचा मृत्यू झाला. भाऊबीज सणाच्या दिवसाची नेरळ परिसरात ही घटना घडल्याने हळहळ व्यक्त केली जात आहे.
कर्जत तालुक्यातील पिंपळोली गावातील हलवाई असलेले मल्हार सोनावळे (वय ३०) स्वतःच्या कारने घरी पककक होते. गुरुवारी (ता.२३) पहाटे मल्हार सोनावळे नेरळ-कोल्हारे रस्त्याने पिंपळोलीकडे गावाकडे निघाले होते. साई मंदिर नाका पार करून काही अंतरावर गेल्यानंतर, बोपेले रोडवरील मंगलमूर्ती निवास परिसरात त्यांच्या कारवरील नियंत्रण सुटले. गाडी थेट रस्त्यालगत असलेल्या दुकानाच्या शटरला आदळली. या अपघातामुळे काही काळ गोंधळाचे वातावरण निर्माण झाले. अपघात कारचे मोठे नुकसान झाले आहे. पण मल्हार यांना कोणतीही बाह्य जखम झाली नव्हती. त्यांना तत्काळ रुग्णालयात नेण्यात आले. परंतु, डॉक्टरांनी हृदयविकाराच्या झटक्याने त्यांचा मृत्यू झाल्याचे स्पष्ट केले. या घटनेची नोंद नेरळ पोलिस ठाण्यात करण्यात आली आहे. तसेच अपघातामुळे झालेल्या नुकसानीचा पोलिसांनी पंचनामा केला आहे.