लोकल प्रवासात सोनसाखळी चोरीला
सकाळ वृत्तसेवा
ठाणे, ता. २६ ः ठाण्यात लोकल प्रवासातील गर्दीतून उतरताना एका ज्येष्ठाची सोनसाखळी चोरीला गेल्याची घटना समोर आली आहे. या घटनेत ३० ग्रॅम वजनाची सोनसाखळी चोरल्याचे तक्रारीत नमूद केले गेले आहे.
६१ वर्षीय ज्येष्ठ हे विलेपार्ले येथे राहणारे असून त्यांचा स्वतःचा प्रिंटिंग प्रेसचा व्यवसाय आहे. गुरुवारी (ता. २३) ते सकाळी भाऊबीजेनिमित्त बहिणीकडे गेले होते. या वेळी ठाणे रेल्वेस्थानकात उतरताना गळ्यातील सोनसाखळी खेचल्याचे त्यांना जाणवले. फलाटावर उतरल्यावर सोनसाखळी मिळून आली नाही. याप्रकरणी त्यांनी ठाणे लोहमार्ग पोलिस ठाण्यात तक्रार नोंदवली. यामध्ये २१ हजार रुपये किमतीची ३० ग्रॅम वजनाची सोनसाखळी चोरीला गेल्याचे नमूद करण्यात आले आहे. पुढील तपास ठाणे लोहमार्ग पोलिस करीत आहेत.