एपीएमसी बाजारात स्ट्रॉबेरी दाखल
तुर्भे, ता. २५ (बातमीदार) ः थंडीची चाहूल लागताच बाजारात स्ट्रॉबेरी दाखल होण्यास सुरुवात होते. यंदा पाऊस लांबल्याने त्याचा स्टॉबेरी पिकांवर परिणाम झाला असला तरी वाशीतील एपीएमसी बाजारात तुरळक स्वरूपात आवक सुरू झाली आहे.
वाशीतील एपीएमसी बाजारात ऑक्टोबर-नोव्हेंबरमध्ये स्ट्रॉबेरीच्या हंगामाला सुरुवात होते. सातारापाठोपाठ नाशिक जिल्ह्यातून स्ट्रॉबेरीची आवक होत असते; मात्र साताऱ्यातील स्ट्रॉबेरी चवीला अधिक गोड, आकारालादेखील मोठी असल्याने ग्राहकांची अधिक पसंती असते. यंदा मात्र पाऊस अधिक पडल्याने साताऱ्यात बऱ्याच प्रमाणात पीक वाया गेले. त्यामुळे शेतकऱ्यांनी दुबार पीक घेतल्याने उत्पादनास थोडा अवधी लागला आहे. नोव्हेंबरमध्ये आवक वाढण्यास सुरुवात होणार असून त्यानंतरच मुख्य हंगामाला सुरुवात होणार आहे.
-------------------------------------
पाडव्यापासून बाजारात तुरळक अशी ५० ते ६० बॉक्स स्ट्रॉबेरी दाखल होत आहे. त्याची प्रतिकिलो ६०० ते ७०० रुपये प्रतिकिलो दराने विक्री होते.
- संजय पिंपळे, व्यापारी