पनवेलमध्ये ‘संगीत मॅरेथॉन’
नवीन पनवेल (बातमीदार) ः माजी खासदार रामशेठ ठाकूर यांच्या अमृतमहोत्सवी वर्षानिमित्त उत्कर्ष संगीत मैफिलतर्फे मराठी आणि हिंदी सुमधुर ७५ गाण्यांचा बहारदार कार्यक्रम अर्थात संगीत मॅरेथॉनचे शनिवारी (ता. १) पनवेलमध्ये आयोजन करण्यात आले आहे.
गायक गोपाळ पाटील यांच्या संकल्पनेतून पनवेलमधील आद्य क्रांतिवीर वासुदेव बळवंत फडके नाट्यगृह येथे हा कार्यक्रम आयोजित करण्यात आला आहे. या कार्यक्रमात गायक गोपाळ पाटील स्वतः ७५ गाण्यांचे सादरीकरण करणार असून, या कार्यक्रमात उरण, पनवेल आणि नवी मुंबई येथील ७५ गायकांचा गायक म्हणून सहभाग लाभणार आहे. रामशेठ ठाकूर यांनी यंदा ७५ व्या अर्थात अमृतमहोत्सवी वर्षात पदार्पण केले. त्याच अनुषंगाने उत्कर्ष संगीत मैफिल प्रस्तुत ७५ गाण्यांची संगीत मॅरेथॉन होणार असून, रसिक प्रेक्षकांनी या अनोख्या गायन पर्वाचा लाभ घ्यावा, असे आवाहन गायक गोपाळ पाटील आणि सहकारी गायकांनी केले आहे.