रायगड जिल्ह्यात छटपूजेचा उत्साह
अलिबाग, ता. २७ (वार्ताहर)ः रायगड जिल्ह्यातील विविध ठिकाणी उत्तर भारतीय समाजाच्या पारंपरिक आणि श्रद्धेच्या सण छटपूजा उत्साहात साजरी झाली. अलिबाग, पेण, पनवेल, खोपोली, कर्जत, रोहा, मुरूड, उरण परिसरात सणाचा उत्साह मोठ्या प्रमाणावर पाहायला मिळाला.
सूर्यदेवतेची उपासना म्हणून ओळखला जाणारा हा सण चार दिवस चालतो. नहाय-खाय, खरना, संध्याकाळी अर्घ्य आणि सकाळी अर्घ्य अशा टप्प्यांमध्ये हा सण साजरा होतो. छटी मातेच्या पूजेसाठी महिला व पुरुष उपवास धरून नदी, तलाव, समुद्रकिनारे आणि विहिरींच्या काठावर सूर्यास्त आणि सूर्योदयाच्या वेळी अर्घ्य देतात. अलिबाग शहरातील समुद्रकिनारी, रेवदंडा किनारा, तसेच थळ, चौल, नागाव, उरणच्या किनाऱ्यांवर, रोहा, महाड, खोपोली, कर्जत पनवेल तालुक्यात नदीकिनारी पूजेसाठी मंडप उभारण्यात आले होते. स्थानिक प्रशासन, पोलिस विभाग आणि नगरपालिका यांच्याकडून तयारीचा आढावा घेण्यात येत असून, स्वयंसेवी संस्था आणि सामाजिक संघटनांनीदेखील स्वच्छता व सुरक्षा व्यवस्थेत हातभार लावला आहे. अनेक ठिकाणी सांस्कृतिक कार्यक्रमांबरोबर छट गीतांचा सुरेल गाण्याचा गजर घुमत होता.
-------------------------------
ऐक्याचे प्रतीक
रायगड जिल्ह्यात स्थलांतरित लोकांमुळे आता छटपूजेचा सण उत्तर भारतीय समाजापुरता राहिलेला नाही. स्थानिक मराठी नागरिकांना आकर्षित लागला आहे. श्रद्धा, उत्साह आणि सामाजिक ऐक्याचे प्रतीक असलेला हा सण यंदा भव्यतेने साजरा होताना दिसत आहे.