महिलेची फसवणूक करणारा गजाआड
चेंबूर, ता. २९ (बातमीदार) ः चेंबूर परिसरातील सी. जी. गिडवाणी मार्गावरील महिलेची फसवणूक करणाऱ्या आरोपीला मुंबई गुन्हे शाखा सहा यांनी अटक केली आहे. राहुल कन्हैया सोलंकी (३०) असे अटक करण्यात आलेल्या आरोपीचे नाव आहे.
चेंबूर पोलिस ठाण्यांतर्गत सी. जी. गिडवाणी मार्गावरील युको सिझलर्स हॉटेलसमोर फिर्यादीला दोन अनोळखी व्यक्‍तींनी बोलण्यामध्ये गुंतवून त्यांना निळ्या रंगाच्या रूमालामध्ये बांधलेल्या पैशांचा बंडल देत असल्याचे भासवून महिलेच्या गळ्यातील सोन्याचे मंगळसूत्र काढून घेतले; मात्र फिर्यादी महिलेला रूमालातील पैसे न देता कागदांचे बंडल देवून तिची फसवणूक केली. याबाबत चेंबूर पोलिस ठाण्यात गुन्हा नोंद करण्यात आला होता. कसून चौकशी केली असता त्याने पोलिस आयुक्तालय, ठाणे आयुक्तालय, नवी मुंबई आयुक्तालय, मिरा-भाईंदर, वसई-विरार आयुक्तालयाच्या हद्दीत गुन्हे केले असल्याची माहिती मिळाली आहे. फसवणुकीच्या गुन्ह्यातील मालमत्ता हस्तगत केली असून हातचलाखी करून फसवणुकीचे एकूण चार गुन्हे उघडकीस आले आहेत.