भिवंडी (वार्ताहर) ः मुंबई शहराला पाणीपुरवठा करणाऱ्या जलवाहिनी रस्त्यावर एका भरधाव टेम्पोच्या धडकेत दुचाकीस्वाराचा मृत्यू झाल्याची घटना घडली आहे. धीरज तानाजी ठाकर (वय ३९, रा. ठाकराचा पाडा) मृत तरुणाचे नाव आहे. पोलिसांनी दिलेल्या माहितीनुसार, धीरज हा सोमवारी (ता. २७) रात्री आठ वाजताच्या सुमारास मोटारसायकलने कामावरून टेमघर पाइपलाइन रस्त्याने घरी येत असताना फेणेगावजवळ ताडाळी नाक्याकडे जाणाऱ्या रस्त्यावर भरधाव पिकअप टेम्पो (क्र. एमएच ०४ जेके ४३७८)ने दिलेल्या धडकेत दुचाकीवरील धीरज हा रस्त्यावर पडून गंभीर जखमी झाला. त्यानंतर ग्रामस्थांनी घटनास्थळी धाव घेत त्यास खासगी रुग्णालयात उपचारासाठी दाखल केले; परंतु उपचारादरम्यान त्याचा मृत्यू झाला. याप्रकरणी भिवंडी शहर पोलिस ठाण्यात चालकाविरोधात गुन्हा दाखल केला आहे.