भाजीपाला बाजारात बटाट्याची विक्री
उच्च न्यायालयात जाण्याचा व्यापाऱ्यांचा इशारा
तुर्भे, ता. ३ (बातमीदार) : मुंबई कृषी उत्पन्न बाजार समिती आवारात कृषी मालासाठी स्वतंत्र बाजार पेठ आहे, मात्र असे असताना भाजीपाला मार्केटमध्ये कांदा-बटाटाची बेकायदा विक्री करण्यात येत आहे. यामुळे नुकसान होत असल्याने न्यायालयात जाण्याचा व्यापाऱ्यांनी इशारा दिला आहे.
मुंबई कृषी उत्पन्न बाजार समितीच्या आवारात कांदा-बटाटा, भाजीपाला, फळे, मसाला व दाणा बाजार अशा प्रकारच्या स्वतंत्र बाजारपेठा आहेत. प्रत्येक मार्केटमध्ये त्या त्या वस्तूची विक्री बंधनकारक आहे. तरीही भाजी मार्केटमधील काही व्यापारी कांदा-बटाटा विक्री करत असल्याचे समोर आले आहे. यामुळे कांदा-बटाटा बाजारपेठेतील व्यापाऱ्यांनी तीव्र नाराजी व्यक्त केली आहे. भाजीपाला बाजारातील काही व्यापारी कांदा-बटाट्याची विक्री करत आहेत. त्यामुळे कांदा-बटाटा बाजारातील ३२ व्यापारांनी बाजार समिती सचिवांकडे केली आहे. तरीसुद्धा कोणत्याही प्रकारची कारवाई झालेली नाही. त्यामुळे बेकायदा व्यापारामागे मोठा भ्रष्टाचार होत असल्याचा आरोप व्यापाऱ्यांनी केला आहे.
--------------------------------
जिल्हाधिकाऱ्यांकडे तक्रार
भाजीपाला बाजारात होणारी कांदा-बटाट्याची विक्री थांबविण्याबाबत कोणतेही प्रयत्न केले जात नाहीत. त्यामुळे व्यापाऱ्यांनी जिल्हाधिकाऱ्यांकडेही तक्रार केली आहे, परंतु तरीही कोणत्याही प्रकारची कारवाई होत नसल्याचे व्यापाऱ्यांचे म्हणणे आहे.
-----------------------------------
परवानगी नाकारली
बिगर गाळाधारक चैतन्य ट्रेडर्स यांनीदेखील भाजीपाला मार्केटमध्ये कांदा-बटाटा विकण्याची परवानगी संबंधी निवेदन ९ जुलै २०२५ रोजी एपीएमसी प्रशासनाला दिले होते, परंतु मुख्य बाजार आवार कांदा-बटाटा मार्केट विभागाच्या उपसचिवांनी ही परवानगी नाकारली होती.
------------------------------
एपीएमसी मार्केटमधील प्रकार चुकीचा आहे. यावर प्रशासनाने त्वरित प्रतिबंध आणावा, नाहीतर उच्च न्यायालयात दाद मागितली जाईल.
- दिगंबर राऊत, व्यापारी, कांदा-बटाटा मार्केट