सेव्हन हिल्स रुग्‍णालय पालिकेच्या ताब्यात द्या!
अंधेरी विकास समितीचे गुरुवारी आंदोलन
सकाळ वृत्तसेवा
मुंबई, ता. ३ : अंधेरी येथील अद्ययावत सेव्हन हिल्स रुग्णालय पालिकेच्या ताब्यात द्यावे, ही मुंबईकरांची मागणी आहे. कोणत्याही परिस्थितीत या रुग्णालयाचे खासगीकरण करू नये. सरकारने या मागणीची तत्काळ दखल घ्यावी, यासाठी गुरुवारी (ता. ६) अंधेरी विकास समितीने तीव्र आंदोलनाचा इशारा दिला आहे.
मुंबईचे माजी उपमहापौर तथा काँग्रेसचे उपाध्यक्ष राजेश शर्मा म्हणाले की, सेव्हन हिल्स रुग्णालय महापालिकेने ताब्यात घ्यावे, यासाठी मागील काही महिन्यांपासून प्रयत्न केला जात आहे. मुख्यमंत्री देवेंद्र फडणवीस, पालिका व संबंधित यंत्रणांकडे यासंदर्भात सातत्याने पाठपुरावा केला आहे. कोणत्याही यंत्रणांकडून त्याला प्रतिसाद दिला जात नाही. मुंबई महापालिका आणि राज्य सरकारने सार्वजनिक गरजा लक्षात घेऊन प्रगत वैद्यकीय संशोधन केंद्र आणि शिक्षणासह आंतरराष्ट्रीय दर्जाचे रुग्णालय म्हणून विकसित करण्याचा विचार करणे आवश्यक आहे. रुग्णालयाच्या आवारात शिल्लक असलेल्या जागेवर परिचारिका प्रशिक्षण महाविद्यालय सुरू करता येऊ शकते.
सेव्हन हिल्स रुग्णालयाच्या जागेचा मूळ मालकी हक्क मुंबई महापालिकेचा आहे. पालिकेने ही जागा सेव्हन हिल्स रुग्णालयाला लीजवर दिली आहे. मुंबई महापालिकेने दुसऱ्या कोणत्याही खासगी कंपनीच्या ताब्यात ती जागा जाऊ न देता स्वतः ताब्यात घेतली, तर मुंबईमध्ये एक प्रशस्त, अत्याधुनिक, सर्व सोयीनियुक्त असे महत्त्वाचे आरोग्य केंद्र बनू शकते. त्यामुळे मुंबईकरांना अत्याधुनिक आरोग्यसेवा देण्यासाठी पुढाकार घ्यावा, असेही राजेश शर्मा म्हणाले.