भाईंदर, ता. ३ (बातमीदार) : मिरा-भाईंदर महापालिकेच्या अत्यावश्यक सेवेतील स्थायी अथवा कंत्राटी कर्मचाऱ्यांनी यापुढे अचानक काम बंद आंदोलन केले, तर त्यांच्यावर नियमातील तरतुदीनुसार गुन्हा दाखल केला जाईल, असा इशारा आयुक्त राधाबिनोद शर्मा यांनी दिला आहे.

महापालिकेचे पाणीपुरवठा, सार्वजनिक आरोग्य, वैद्यकीय आरोग्य, परिवहन आदी विभाग अत्यावश्यक सेवेत मोडतात. या विभागांकडून नागरिकांना देण्यात येणाऱ्या सेवा अखंडित सुरू राहणे अपेक्षित असते, मात्र अनेकवेळा आपल्या मागण्या मान्य करण्यासाठी या विभागातील स्थायी अथवा अस्थायी कर्मचारी अचानक काम बंद आंदोलन पुकारतात. त्यामुळे या सेवा काही काळासाठी ठप्प होतात. त्याचा नागरिकांना मनस्ताप सोसावा लागतो. महापालिकेच्या या सेवांवर नागरिक अवलंबून असल्याने त्याचा फायदा कर्मचाऱ्यांकडून घेतला जातो व प्रशासनाला वेठीस धरले जाते.

महाराष्ट्र अत्यावश्यक सेवा परीरक्षक अधिनियमानुसार अत्यावश्यक सेवेत काम करणाऱ्या कर्मचाऱ्यांनी अचानक काम बंद आंदोलन करण्यास मनाई आहे. तसेच अत्यावश्यक सेवेत काम करणाऱ्यांनी संप अथवा नागरिकांची गैरसोय होईल, अशा पद्धतीने वर्तन केल्यास कारवाई करण्याची तरतूद या अधिनियमात करण्यात आली आहे, मात्र अनेकवेळा त्यांनी अचानक आंदोलन केल्यानंतरही महापालिकेने त्यांच्याविरोधात ठोस कारवाई केली नव्हती. आता मात्र आयुक्त राधाबिनोद शर्मा यांनी यासंदर्भातील लेखी आदेश जारी केले आहेत.