उल्हासनगर, ता. ४ (वार्ताहर) ः अखेर दीर्घ प्रतीक्षेनंतर कल्याण-मुरबाड महामार्गावरील शहाड उड्डाणपुलाच्या डांबरीकरण व दुरुस्तीच्या कामाला मध्यरात्रीपासून सुरुवात झाली आहे. त्यानुसार पुलावरील वाहतूक बंद करण्यात आली आहे. ठाणे वाहतूक विभागाचे अधिसूचनेनुसार वाहतूक बंदीची अंमलबजावणी करण्यात आली आणि काही मिनिटांतच यंत्रसामग्री, कामगार आणि अभियंते युद्धपातळीवर कार्यरत झाले. या निर्णयामुळे आता रविवार (ता. २३)पर्यंत या उड्डाणपुलावरून कोणतीही वाहतूक होणार नाही, अशी माहिती वाहतूक विभागाचे वरिष्ठ पोलिस निरीक्षक राजेश शिरसाट यांनी दिली.

राष्ट्रीय महामार्ग विभाग आणि संरचना कंपनी यांच्या संयुक्त विद्यमाने या कामासाठी यंत्रसामग्री तैनात करण्यात आली आहे. पुलावरील जुना डांबर थर पूर्णपणे काढून टाकून नवीन टिकाऊ थर बसविण्याचे नियोजन आहे. त्याचबरोबर पुलाच्या रेलिंग, लाइटिंग आणि इतर काही महत्त्वाच्या दुरुस्त्याही केल्या जाणार आहेत. या कामावर उल्हासनगर वाहतूक विभागाचे वरिष्ठ पोलिस निरीक्षक राजेश शिरसाट आणि त्यांचे पथक विशेष लक्ष ठेवून आहेत. काम २४ तासांच्या पाळीमध्ये सुरू राहणार असून, रात्रीच्या वेळीही रोलर, कटिंग मशीन आणि क्रेनची हालचाल दिसत आहे.

वाहतूक विभागाने जारी केलेल्या अधिसूचनेनुसार २३ नोव्हेंबरपर्यंत वाहनचालकांना इतर पर्यायी मार्ग वापरण्याचे निर्देश देण्यात आले आहेत. पुलाजवळील चौकांवर पोलिसांनी दिशा फलक, प्रतिबंधक बॅरिकेड्स, रिफ्लेक्टर आणि सूचना फलक बसवले आहेत. तसेच वाहतूक सुरळीत राहावी, यासाठी अतिरिक्त मनुष्यबळ तैनात करण्यात आले आहे.

शहाड उड्डाणपुलावरील वाहतूक बंदी ही नागरिकांच्या सुरक्षेसाठी आणि पुलाच्या दुरुस्तीच्या दृष्टीने आवश्यक आहे. काम युद्धपातळीवर सुरू असून, सर्व मार्गांवर अधिकारी व कर्मचारी तैनात आहेत. नागरिकांनी प्रशासनाने निश्चित केलेल्या पर्यायी मार्गांचा वापर करून सहकार्य करावे.
- राजेश शिरसाट, वरिष्ठ पोलिस निरीक्षक, उल्हासनगर वाहतूक विभाग