कल्याण पूर्वेत मोफत थर्मल ॲक्यूप्रेशर मसाज थेरपी सेंटर सुरू
कल्याण, ता. ५ (बातमीदार) : पूर्वेकडील मातोश्री गुंजाई चौक परिसरात नागरिकांसाठी आरोग्यदायी उपक्रम म्हणून अत्याधुनिक पद्धतीचे विनामूल्य थर्मल ॲक्यूप्रेशर मसाज थेरपी सेंटर सुरू करण्यात आले आहे. हे केंद्र सर्व वयोगटातील पुरुष व महिला नागरिकांसाठी खुले करण्यात आले आहे. या केंद्रात अत्याधुनिक दोन मसाज बेडच्या माध्यमातून पूर्णपणे स्वयंचलित पद्धतीने केला जातो. या प्रक्रियेत कोणत्याही व्यक्तीचा शारीरिक स्पर्श होत नाही. त्यामुळे ही सेवा सुरक्षित आणि आधुनिक तंत्रज्ञानावर आधारित असल्याचे आयोजकांनी सांगितले.
सिकसेम या जागतिक ख्यातीच्या कंपनीद्वारे ही थर्मल ॲक्यूप्रेशर मसाज थेरपी प्रदान केली जाते. या कंपनीच्या विविध शाखांमधून जगभरातील लाखो लोकांनी या मोफत सेवांचा लाभ घेतला आहे. या सेवेसाठी कोणतेही शुल्क आकारले जाणार नाही, असे आयोजक अविनाश गायकवाड यांनी सांगितले आहे. रविवार वगळता आठवड्याच्या सर्व दिवशी हे केंद्र कार्यरत राहील.

सुरक्षित व प्रभावी उपचार
ही थेरपी स्वयंपूर्ण, आधुनिक मशीनद्वारे केली जाते, जिथे उष्णतेच्या सहाय्याने ॲक्यूप्रेशर बिंदू सक्रिय करून संपूर्ण शरीराची मसाज दिली जाते. या मसाज थेरपीमुळे शरीरातले ऊर्जा प्रवाह संतुलित होतो आणि नैसर्गिक उपचार क्रिया चालू होतात. या थेरपीचा वापर विशेषतः वेदना कमी करण्यासाठी, तणाव निवारण्यासाठी, रक्ताभिसरण सुधारण्यासाठी आणि आरोग्य सुधारण्यासाठी केला जातो. तसेच आधुनिक मशीनवर हे मसाज आपोआप करता येते. ज्यामुळे सुरक्षित व प्रभावी उपचार मिळतात.