खोदकामात भूमिगत वाहिनीचे नुकसान
कांदिवली परिसरात चार तास वीज खंडित
कांदिवली, ता. ५ (बातमीदार) ः कांदिवली गावठाण मार्गाच्या नूतनीकरणासाठी खोदकाम सुरू असून, भूमिगत विजेची वाहिनी तसेच जलवाहिनी, मलनिस्सारण वाहिनीचे नुकसान झाल्‍याने तब्‍बल चार तास वीजपुरवठा खंडित झाला होता.
खोदकाम सुरू असल्‍यापासून अधूनमधून पडणारा पाऊस, पडलेले खड्डे, चिखल-माती यामुळे गावकऱ्यांना काम सुरू केल्यापासून समस्यांना सामोरे जात आहे. कांदिवली गावठाण मार्ग हा महावीर नगर, चारकोप, गोराईकडे जाण्यासाठी कमी अंतराचा मार्ग आहे. या अरुंद मार्गावर मोठ्या प्रमाणात वाहतूक असते. त्यातच गावठाण असल्याने मटण, चिकन आणि मच्छी मार्केट आहे. त्‍यामुळे या कमी अंतराच्या मार्गावर प्रवाशांची तसेच वाहतुकीची नेहमीच रेलचेल असते.
या मार्गाचे ऑक्टोबरमध्ये काम सुरू करण्यात आले. खोदकाम करून पाइप टाकण्याचे काम सुरू आहे. अरुंद मार्ग असल्याने वाहतुकीस मार्ग बंद ठेवण्यात आला आहे. त्‍यामुळे वाहनचालकांना अधिक अंतराच्या मार्गाने प्रवास करावा लागत आहे. तसेच जेसीबीने खोदकाम सुरू असल्याने भूमिगत मलनिस्सारण वाहिनी तुटली, त्यानंतर जलवाहिनी फुटली. थोड्या अंतरावर असणारी विजेची केबल तुटली. खोदकामात बाजूला टाकण्यात आलेले मातीचे ढिगारे, पाऊस यामुळे स्थानिकांना आणि दुचाकीस्वारांना तारेवरची कसरत करत प्रवास करावा लागत आहे. सयेथील काम योग्‍य प्रकारे सुरू नसल्‍याने अनेक समस्‍यांचा सामना करावा लागत आहे, अशी प्रतिक्रिया श्री साई सेवा मंडळ गावठाण अध्यक्ष आशीष पाटील यांनी दिली.